Saksi ang panahon sa pag-abuso ng mga tao sa kasaganahan ng sangnilikha. Tayo'y mga ganid at walang kabusugan. Madalas na hindi natin batid kung hanggang kailan ba upang masabing sapat. Dinala tayo ng hindi mapawi nating pagkauhaw tungo sa isang namamatay na planeta - isang planetang umaapaw sa basura, polusyon at pagkawala ng buhay.
Laging may panahon. Sakali mang huli na, maaari pa rin nating baligtarin ang kalagayan. Ang kapisanang Rights of Nature ay isang lantad, hindi marahas, nagtutulungan at sama-samang pamayanang may matibay na pagtaya sa iisang mithiin - ang kilalanin at itaguyod ang Rights of Nature o Mga Karapatan ng Kalikasan.
Upang matiyak na ating naipagtatanggol at napapalago ang mga natitira pang tagapangalaga ng kalikasan, sinumang nagnanais sumali sa Kapisanang Rights of Nature ay dapat mangakong tatalima sa Alituntunin ng Kagandahang Asal nito. Ang panunumpa ng buong katapatan sa nasabing kagandahang asal ay magtitiyak na malinaw na naitataguyod ang mga prinsipyo at kahalagahan ng kapisanan.
Alituntunin ng Kagandahang Asal para sa mga tagapagtaguyod ng Mga Karapatan ng Kalikasan
1. Paggalang sa Kalikasan: Kikilalanin ko at igagalang ang katutubong kahalagahan at karapatan ng kalikasan, nang malaya sa kapakinabangan nito sa mga tao.
2. Di-Marahas: Itataguyod ko ang di-marahas at mapayapang pamamaraan ng pagprotekta at pagtatanggol sa mga karapatan ng kalikasan, at tututulan ang anumang anyo ng karahasan, pananalakay, o pangwawasak.
3. Sustenabilidad: Pagsisikapan kong itaguyod ang mga sustenableng kinagawian na sumusuporta sa kapakanan ng kalikasan, pati na sa pamayanan ng mga taong umaasa rito, sa pangmatagalan.
4. Pakikipagtulungan: Aktibo kong hahanapin at makikipag-ugnayan sa mga indibidwal, komunidad, at samahang may kaparehong pagtaya sa Mga Karapatan ng Kalikasan at makikipagtulungan tungo sa pagkamit ng ating mga ibinahagi at parehong mithiin.
5. Kalinawan: Isasagawa ko ang aking gawaing adbokasiya sa isang lantad, tapat, at malinaw na paraan, maliwanag at totoo ang pakikipag-usap hinggil sa mga isyung aking pinagtutuunan at sa mga kalutasang aking isinasagawa kapwa sa konsepto at pananalapi.
6. Pananagutan: Pananagutan ko ang aking sarili para sa aking mga ginagawa, kapasiyahan, at pagtaya, at mananagot para sa anumang pinsalang dulot ng aking mga ginawa o hindi ginawa. Magiging bukas ako sa puna at patuloy na titiyakin na ang aking pakikitungo ay batay sa prinsipyo ng kapisanan.
7. Patuloy na Pag-aaral: Patuloy kong pag-aaralan ang mga prinsipyo at kahalagahan ng Mga Karapatan ng Kalikasan, gayundin ang mga isyung pangkapaligiran, panlipunan, at pang-ekonomiya na nakakaapekto sa kalikasan at pamayanan ng mga tao. Magiging bukas ako at ibabahagi ang aking mga natutunan sa kapisanan at magiging bukas na matuto pa sa aking mga kasama sa kapisanan.
8. Personal na Integridad: Kikilos ako nang may integridad at paninindigan ang mga pamantayang etikal sa lahat ng aspeto ng aking personal at propesyonal na trabaho lalo na sa aking gawaing adbokasiya, kabilang ang pag-iwas sa mga salungatan ng interes, pagpapanatili ng pagiging kumpidensyal, at pagtrato sa lahat ng indibidwal nang may paggalang at dignidad. Isasabuhay ko ang "Pamumuhay ng Sapat" bilang sukatan ng aking integridad at pagtaya, na masinsinang sinusukat ang lahat ng aspeto ng aking pang-araw-araw na pagkonsumo upang maging sapat lamang at di na hihigit pa.
Sa araw na ito ng ______, tumataya ako sa Alituntuning ito na itaguyod ang mga prinsipyo at halaga ng Mga Karapatan ng Kalikasan, at mag-ambag tungo sa mas makatarungan, sustenable, at pantay na kinabukasan para sa lahat ng nilalang sa planetang ito.
* Ilang pahayag sa pagsasalin:
(1) Hindi natin verbatim na ginamit ang Kodigo bilang salin ng Code, dahil sa sikat na konotasyong pangongopya sa pagsusulit ang kodigo. Mas ginamit natin ang Alituntunin, na mas malapit na salin ng Code, upang mapag-iba sa kodigo.
(2) Ang Ethics, imbes na Etika o alituntunin ng moralidad, ay Kagandahang Asal, upang mas maipatimo ang nais na layunin.
(3) Ang Movement o Kilusan ay isinalin ko sa Kapisanan upang mapag-iba sa popular na katawagang Kilusan, na madalas tumutukoy sa ibang grupong may ibang layunin.
